ଭଞ୍ଜନଗର(ନିଲୁ ବିଷୋୟୀ): ଭଞ୍ଜନଗର ଏଡିଜେଙ୍କ ସରକାରୀ ବାସଭବନରୁ ଗତମାସ ୨୧ ତାରିଖ ଦିନ ଚୋରୀ ହୋଇଥିବା ଅଭିଯୋଗ ହୋଇଥିଲା । ଜଣେ ବିଚାରପତିଙ୍କ ଘରୁ ଚୋରୀ ହୋଇଥିବା ବେଳେ ଥାନା ଠାରୁ କିଛି ଦୂରରେ ଏଡିଜେଙ୍କ ସରକାରୀ କ୍ବାଟର୍ସ ରହିଥିଲା । ଏହା ପୁଲିସ୍ ପାଇଁ ଖୋଲା ଚାଲେଞ୍ଜ ସୃଷ୍ଟି କରିଥିବା ବେଳେ ରବିବାର ପୁଲିସ୍ ଏହି ଚୋରୀ ଘଟଣାର ସଂପୃକ୍ତି ଥିବା ଅଭିଯୁକ୍ତମାନଙ୍କୁ ଭୂବନେଶ୍ବରରୁ ଗିରଫ କରି କୋର୍ଟ ଚାଲାଣ କରିଛି । ଅଭିଯୁକ୍ତମାନେ ହେଲେ ଭଞ୍ଜନଗରର ଚଗଲା ମଲ୍ଲିକ ଓ ତୋଫାନ ମହାରଣା । ଉଭୟଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ କୁମାର ମୁଦୁଲି ସୂଚନା ଦେଇଛନ୍ତି। ଛୁଟି ଯୋଗୁ ଏଜିଜେ ଗତ ମାସ ୧୪ ତାରିଖରୁ କ୍ବାଟର ବନ୍ଦ କରି ପଳାଇଥିଲେ । ୨୧ ତାରିଖ ଦିନ ସେ ଫେରିଥିଲେ । ଫେରିବା ପରେ ଘର ଭିତରୁ କେହି ଦୁବୃର୍ତ୍ତ ଆଲମିରା ଭାଙ୍ଗି ୨ଟି ସୁନା ଚୁଡି, ୨ଟି ସୁନା କାନ ଫୁଲ ସହ ୧୦ ହଜାର ଟଙ୍କା ଚୋରୀ କରି ନେଇଥିବା ଦେଖିବାକୁ ପାଇ ଭଞ୍ଜନଗର ଥାନାରେ ଲିଖିତ ଅଭିଯୋଗ କରିଥିଲେ । ଏହା ପରେ ପୁଲିସ୍ କେସ୍ ନମ୍ବର ୯୬୯/୨୪ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଥାନା ଅଧିକାରୀ ଶ୍ରୀ ମୁଦୁଲି କହିଥିଲେ । ଏଥି ସହ ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ଆସି ଅନୁସନ୍ଧାନ କରି ଫେରିଥିବା ବେଳେ ଆଜି ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିବା ସେ ସୂଚନା ଦେଇଛନ୍ତି ।
