ରା.ଉଦୟଗିରି ( ମିହିର ପ୍ରସାଦ ମାଳୀ ): ଗଜପତି ଜିଲ୍ଲା ପୁଲିସକୁ ମିଳିଛି ଏକ ବଡ ସଫଳତା । ଏକ ପ୍ରତିଷ୍ଠିତ ଗଣମାଧ୍ୟମର ଜଣେ କାର୍ଯ୍ୟରତ ସାମ୍ବାଦିକଙ୍କ ଘରୁ ଚୋରି ଘଟଣାରେ ପୁଲିସ ୨ ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କ ଠାରୁ ଚୋରୀ ସାମଗ୍ରୀ ଜବତ କରିଛି l ଗିରଫ ଅଭିଯୁକ୍ତମାନେ ହେଲେ ରାମଗିରି ଅଞ୍ଚଳର ଗନନ ବଡମୁଣ୍ଡି ଓ ତ୍ରିନାଥ ବଡମୁଣ୍ଡି l ଏଥି ସହ ଚୋରି ସାମଗ୍ରୀ କିଣିଥିବା ୨ ଅଭିଯୁକ୍ତଙ୍କୁ ମଧ୍ୟ ପୁଲିସ ଗିରଫ କରିଛି । 
ମିଳିଥିବା ସୂଚନା ଅନୁସାରେ ଗତ ୨୦୨୩ ଡିସେମ୍ବର ୨୫ ତାରିଖରେ ଗଜପତି ଜିଲ୍ଲା ମୋହନା ଥାନା ଲୁହାଗୁଡି ଗ୍ରାମକୁ ଗଣମାଧ୍ୟମ ପ୍ରତିନିଧି ତାଙ୍କ ପରିବାର ସହ ବୁଲିବାକୁ ଯାଇଥିବା ବେଳେ ସେହି ରାତ୍ରୀରେ ଦୁଇ ଅଭିଯୁକ୍ତ ଘରର କବାଟ ତାଲା ଭାଙ୍ଗି ଘରୁ ଏଲଇଡି ଟିଭି, କ୍ୟାମେରା, ମୋବାଇଲ ସମେତ ଘରର କିଛି ସାମଗ୍ରୀ ଚୋରି କରି ନେଇ ଯାଇଥିଲେ । ଏନେଇ ମୋହନା ଥାନାରେ ଅଭିଯୋଗ ହୋଇଥିବାବେଳେ ଅଭିଯୁକ୍ତମାନେ ଘଟଣା ପରଠାରୁ ଫେରାର ଥିଲେ । ପୁଲିସ ଚୋରି ହୋଇଥିବା ମୋବାଇଲକୁ ଟ୍ରାକ୍ କରି ଅଭିଯୁକ୍ତମାନଙ୍କୁ ରାମଗିରି ଅଞ୍ଚଳରୁ ଗିରଫ କରିଥିବା ବେଳେ ଚୋରି ଟିଭି ଓ କ୍ୟାମେରା କିଣିଥିବା ଦୁଇ ବ୍ୟକ୍ତି ମଧ୍ୟରୁ ଜଣଙ୍କୁ ବ୍ରହ୍ମପୁର ଓ ଅନ୍ୟ ଜଣଙ୍କୁ ଚିକିଟିରୁ ଗିରଫ କରିଛି । ତେବେ ପୂର୍ବରୁ ଏହି ଘଟଣାରେ ମୋବାଇଲ କିଣିଥିବା ଜଣକୁ ଗିରଫ କରାଯାଇଥିବା ବେଳେ ଅଭିଯୁକ୍ତମାନଙ୍କ ଠାରୁ ରାୟଗଡ଼ ଥାନା ଅଧୀନରେ ଚୋରି ହୋଇଥିବା ଆଉ ଦୁଇ ଗୋଟି ଏଲଇଡି ଟିଭି ମଧ୍ୟ ଜବତ କରାଯାଇଥିବା ମୋହନା ଥାନା ଅଧିକାରୀ ବସନ୍ତ କୁମାର ସେଠୀ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
